БИШКЕК, 14-фев. — Sputnik. Дубайда сексуалдык кулчулукка кабылган бир нече кыргызстандык кыз Whatsapp тиркемесинин геолокация (жайгашкан жерди аныктоо) функциясынын жардамы менен табылды. Бул тууралуу Gulf News агенттиги жазып чыкты.
Маалыматка караганда, кыргызстандык кыздар өткөн жылдын июль айында Бириккен Араб Эмираттарына жумуш издеп келишкен. Бул аралыкта алар бир нече иш алмаштырууга жетишкен. Кийин аларга Dubai International City кварталындагы мейманканалардын биринен жумуш сунушталган.
"Көрсө аларды иш берүүчүлөр алдап койгон экен. Кыздар жаңы ишке келгенден кийин кулчулукка тушукканын түшүнүшкөн", — деп жазылат маалыматта.
Тергөө иштеринин натыйжасында кыздарды сойкулукка мажбурлаган Бангладештин27 жаштагы жараны кармалып, кулчулуктан бир нече кыргызстандык кыз чыгарылган. Бирок алардын так саны айтылган эмес. Учурда шаардык прокуратура тарабынан соттук териштирүү иштери жүргүзүлүп жатат.
