Сууктун тумшугу сынып… Бүгүн бир аз чыйрыктырган суук болгону менен күн чайыттай ачык. Кыргызстандык синоптиктер сууктун мизи кайтып келе жатканын билдирип, Ош менен Бишкекте шаарларында 3 градус жылуу болорун кабарлады.
Азаматсыңар! Ден соолугу боюнча мүмкүнчүлүгү чектелген кыргызстандык спортчулар Россияда өткөн дүлөйлөр арасындагы самбо боюнча турнирде эки алтын, эки күмүш медаль утуп алышты. Андыктан ындыны өчүп, наалый берген алты саны соолор, айлананы бир карайлы.
Адам ээй, жүрөгүндө жалы бар жигит окшойт. Карышкырдын алкымына колун салып жиберип аман калган Тоң районунун Калкабар айылынын 27 жаштагы тургуну Кадыржан Шаршенбек уулу окуянын өзү айтып берди. Бул жигиттин окуясын жазып жаткан биздин Расул Усеналиев кайра-кайра тамшанып,"баатыр экен, эй" деп коёт десеңиз. Чын эле жүрөгүндө жалы бар жигит экен.
Дүйнө деми сүрөттөрдө. Бурала бийлеген кыздан "таажыны" башына кийген ханзаадага чейин… Өткөн жумада дүйнө жүзүндө болуп өткөн кызыктуу окуялардын сүрөт түрмөгүнө баам салсаңыз болот.
Кулап баратканда учкучтар эмнени сүйлөшкөн? Мындан туура 23 күн мурда эл аралык "Манас" аба майданынын жанындагы Дача айылына учак кулап, 39 өмүрдү жалмаган. Ошол Boeing-747 учагынын кыйроо себептерин иликтеген комиссия экипаждын сөзүн чечмелеп жатат.
Балыкчылык өтүкчү аял. 57 жаштагы тургуну Татьяна Тугушева 32 жылдан бери өтүкчү болуп иштеп келет. Ал Ысык-Көл облусу боюнча өтүкчүлүктү өздөштүргөн жалгыз аял экенин белгилейт.
Акыр замандын себеби. Окумуштуулар акыр заманга кандай окуялар алып келерин аныкташты.
Саясаттан бир үзүм. Депутат Өмүрбек Бабановдун фракциясы Жогорку Кеңештин төрагасы Чыныбай Турсунбековду кетиребиз деп мандаттарын булгалаган демилгесин токтотту.
Валюта наркы. Бүгүн сомдун баасы долларга карата орто эсеп менен 69.28 (сатып алуу) жана 69.53 (сатуу) сомду түздү.
Мунай баасы. Бишкекте орточо эсеп менен алганда Аи-92 үлгүсүндөгү май 39 сом, Аи-95 үлгүсүндөгү бензин 41 сом, ал эми дизель майы 35.70 сомдон сатылууда.
Соңку сөз ордуна. Кырк жылы кыргын болсо да, бейажал чымын өлбөйт.
Жакшы маанай, майнаптуу күн каалап Нургүл Максутова.
