БИШКЕК, 23-янв. — Sputnik. Алмазбек Атамбаев 23-январда президенттин аппаратынын жетекчиси Фарид Ниязовдон 2016-жылы 11-декабрда өткөн референдумдун жыйынтыктары боюнча киргизилген оӊдоолорду эске алуу менен КР Конституциясынын расмий текстин жарыялоого даярдык көрүү боюнча ведомстволор аралык жумушчу топтун иши тууралуу кабардар болду. Бул тууралуу өлкө башчынын маалымат кызматы билдирди.
Ниязовдун айтымында, мамлекет башчынын буйругу менен түзүлгөн ведомстволор аралык жумушчу топ ишин аяктап жатат.
Мында референдумда кабыл алынган Баш мыйзамга киргизилген өзгөртүүлөрдү эске алуудан тышкары, мамлекеттик жана расмий тилдердеги тексттердин бир катар шайкеш келбестиктерин жоюуну талап кылат.
Мамлекет башчысы жасалган иштердин маанисин белгилөө менен ведомстволор аралык жумушчу топтун мүчөлөрү менен тартылган эксперттердин бул жооптуу ишти аткарууга өтө олуттуу жана дыкат мамиле жасоо зарылдыгына өзгөчө көңүл бурду.
