БИШКЕК, 11-янв. — Sputnik. Ошто өзүн Коомдук телерадиокорпорациясынын (КТРК) журналисти катары тааныштырып, мектеп директорлору менен Билим берүү башкармалыгынын жетекчилеринен акча алууга шектелген жаранды бир айга камакка алуу чечими чыкты. Бул тууралуу Ош облусттук ИИБдин маалымат катчысы Жеңиш Ашырбаев аймактык кабарчыга билдирди.
"Шектүүнүн баш коргоо чарасы Араван райондук соту тарабынан каралып, бир айга камакка алуу чечими чыгарылды. Ал Оштогу №5 тергөө абагына камакка алынат", — деди Ашырбаев.
9 Үчтүн айы 2017, 21:25
Эске сала кетсек, Ош шаарынын Жапалак айылынын 32 жаштагы тургуну аталган райондун мектеп директорлорунан жана Араван райондук Билим берүү башкармалыгынын жетекчилигинен 1500 сомдон "Көгүлтүр от" берүүсүндө "жылдын мыктысы" наамы тапшырыларын убадалап акча чогулткан.
Аталган жаран Араван районунан сырткары, Кара Суу районунда да ушундай ишке баргандыгы боюнча да шектелген.
