Республикалык инфекциялык ооруканага жаңы жылдык майрамдан соң тамак-аштан ууланып кайрылгандар катталган эмес. Бул тууралуу аталган оорукананын реанимация бөлүмүнүн башкы дарыгери Гүлжигит Аалиев Sputnik Кыргызстан маалымат агенттигине билдирди.
Дарыгер тамак-аштан ууланып же ботулизмден жабыркап кайрылгандар азырынча каттала электигин билдирди.
"Биздин ооруканага ар түрдүү инфекциялык оорулар менен бир сутканын ичинде 240 адам кайрылган. Анын 106сы ооруканага жаткырылды. 78и — сасык тумоо менен жабыркагандар. Калганы ичеги-карын оорулары, ангина, менингит ооруларына кабылгандар. Ичи өтүп, кусуп келгендер катталды, бирок тамак-аштан ууландык деп кайрылып келгендер жок ", — деди Аалиев.
Дарыгер ооруканага жаткырылгандардын көбү жаш балдар экенин кошумчалады.
