"Ислам мамлекети" террордук уюму 2017-жылы өзүнүн катарына үгүттөөнү күчөтөт. Андан сырткары, аскерий күчүн да өнүктүүгө болгон далалатын жасайт. Андыктан жакынкы кошуна Афганистанга көз салып турушубуз лаазым. Бул туурасында Sputnik Кыргызстан маалымат агенттигине коопсуздук маселелери боюнча эксперт, атайын кызматтын отставкадагы полковниги Талант Разаков айтып берди.
"Бул уюмду алсырады деп айта албайбыз. Террочулар аларга каршы турган тараптар биримдикке келе албай, олку-солку болгонун көрүп жатат. Алеппону тазалашты эле, эми кайра Пальмираны алдырып жиберишти. Эки жыл мурда "Ислам мамлекетинин" Афганистанда экинчи аскердик база түзүү аракеттери болгон. Афганистандагы Бадахшандын кээ бир райондору "Ислам мамлекетчилери" тарабынан басып алынып, ошол жакта күчөгөн. Талиптер менен учурда алардын ортосунда кандуу кармашуулар болууда. Азыр Ирак менен Сирияны карап жатабыз, Афганистанга көңүл буруп, көз салып турушубуз лаазым", — деди Разаков.
Эксперт бул маселелердин баарын ЖККУ жана ШКУнун алкагында кароо зарылдыгын айтып, кооптуулук дал ушул жактан да жаралганын кошумчалады.
