БИШКЕК, 30-дек. — Sputnik. Тергөө иштерине тоскоолдук көрсөткөн Алай райондук ИИБдин кызматкерлерине Ош облусу боюнча Башкы прокуратура кылмыш ишин козгоду. Бул тууралуу Башкы прокуратуранын маалымат кызматынан кабарлашты.
Билдирмеге караганда, буга чейин Алай райондук ИИБдин тергөөчүсү пара алууга шектелип, ага карата кылмыш иши козголгон. Ал атайын белги коюлган акчаларды алып жаткан жеринен кармалган.
"Шектүүнү кармоо учурунда РИИБдин 15-20 чакты кызматкери мыйзамсыз түрдө тергөө аракеттерине тоскоолдук көрсөтүшкөн. Алар шектүүнү өздөрү менен кошо алып кетүүгө аракет жасашкан. Тергөө иштерин шектүү кармалган жерден улантуу мүмкүн болбой калгандыктан, атайын ыкчам топ прокуратуранын Алай районундагы имаратына жайгашышкан. Бирок РИИБдин кызматкерлери ал жакка да келип, ыкчам топко күч колдонуу менен шектүүнү чыгарып кетишкен", — деп айтылат маалыматта.
Аталган фактыга ылайык, Ош облустук прокуратура тарабынан Кылмыш жаза кодексинин 305 (кызмат ордун кыянаттык менен пайдалануу), 318 (тергөө иштерине тоскоолдук жаратуу) жана 341 (бийлик өкүлдөрүнө күч колдонуу) беренелери боюнча кылмыш иши козголду.
