БИШКЕК, 30-дек. — Sputnik. Жаңы жыл майрамынын алдында Кыргызстандын бардык аймактарынын борбордук аянттарына балатылар коюлду.
Sputnik Кыргызстан агенттиги аймактардагы балатылар менен окурмандарын тааныштырат.
Бишкек
Борбор калаанын "Ала-Тоо" аянтына 25 метрлик балаты коюлду. Ага улуттук стилдеги 77 жасалга илинген. Мындан тышкары, 60 жылдызча жана 50 кар бүртүкчөлөрү менен кооздолгон. Балатыдагы оюнчуктардын жалпы саны 1200дү түзөт. Ошондой эле узундугу 2,5 чакырымга жеткен 260 гирлянд илинди. Жаңы жылдык маанайды жаратуу үчүн Бишкек мэриясы 13 миллион сом сарптады.
Ош
Кыргызстандын экинчи борбору болгон Ош шаарына 30 метрлик балаты коюлду. Жасалга иштерине 899 миң сом сарпталып, улуттук колоритте жасалгаланды. Калаанын борбордук аянтын кооздоо үчүн жалпы жонунан 1 миллион сомго сынак жарыяланган.
Нарын
Нарын шаарынын борборуна 18 метрлик балаты коюлду. Шаарды жаңы жылга карата жасалгалоо үчүн шаардык бюджеттен 150 миң сом бөлүнгөн.
Жалал-Абад
Жалал-Абад шаарынын борбордук аянтына бийиктиги 21 метр болгон балаты коюлду. Жаңы жылдык жасалга үчүн шаардык казынадан 550 миң сом жумшалган.
Талас
Талас шаарынын борборуна коюлган балатынын бийиктиги 20 метрди түзөт. Жергиликтүү бюджеттен жасалгалоо иштерине 96 миң сом каражат бөлүнгөн.
Каракол
Ысык-Көл облусунун борбору Каракол шаарына бийиктиги 20 метр болгон балаты орнотулду. Шаарды жаңы жылга карата кооздоо үчүн жергиликтүү бийлик 450 миң сом сарптады.
Баткен
Баткен шаарына бийиктиги 11 метр болгон балаты коюлду. Жасалгалоо үчүн мэриядан 100 миң сом бөлүнгөн.
Кыргызстандагы башкы балатынын жанышын Sputnik Кыргызстан видеосунун 360 форматынан көрүңүздөр>>
