БИШКЕК, 24-дек. — Sputnik. КВНдин Жогорку лигасынын финалындагы "Азия MIX" командасынын оюнун Россиянын Биринчи каналы Москва убактысы боюнча кечки саат 21.20да көрсөтөт. Бул тууралуу Эл аралык шайырлар жана тапкычтар биримдигинин сайты маалымдаган.
24 Бештин айы 2016, 12:04
Финал жума күнү кечинде өтүп, чемпион титулуна "Азия MIX", Астанадан "Спарта", Ярославлдан "Радио Свобода", Мурманск курама командасы жана Москва цирктин курама командасы ат салышкан.
Үч сынактын жыйынтыгында Кыргызстандын курама командасы 10,9 балл топтоп жеңишти камсыз кылган. Ал эми "Спарта" — 10,6, Мурманск курама командасы — 10,4, Москва циркинин курама командасы 10,2 жана "Радио Свобода" — 9,5 балл топтогон.
"КВНдин Жогорку лигасынын финалы Биринчи каналда 24-декабрда 21.20 да кайталанат", — деп жазылат маалыматта.
"Азия MIX" — Кыргызстандын атынан биринчи жолу КВНдин Жогорку лигасынан жеңип чыккан команда. Былтыр алар жарым финалга чейин жеткен.
