Ветеринардык жана фитосанитардык коопсуздук боюнча инспекциясынын Ош шаардык башкармалыгынын башчысы Кумарбек Исаковдун айтымына караганда, Ош шаарында мал союучу жайлардын бардыгы жабылды.
"Мал союлуучу жайлардын санитардык абалы талапка жооп бербегендиктен жугуштуу оорулардын таркашына себеп болушу мүмкүн. Андыктан адистер Ош шаардык мэриясы менен макулдашып ушундай чечимге келишти", — деп билдирди Исаков.
Мал союучу жайлардын ордуна эт комбинаты ишке киргизилип, тиешелүү шарттар түзүлөт.
"Ал комбинаттан элге тараган эттин санитардык абалы тыкыр көзөмөлгө алынат. Ошондой эле жумуртка, эт, сүт сатуучу атайын жайларды түзүү демилгеси мэрияга сунушталды", — деди Исаков.
Ал мал союлуучу жайлар жабылгандыктан касапканаларда иштеген жарандар жумушсуз калбай тургандыгын, аларга эт комбинаты ишке кирери менен жумуш орундар карала тургандыгын белгиледи.
