БИШКЕК, 21-дек. — Sputnik. Мага кайсыл бир тармакта монаполист болууга укук берсенер, мен мандатымды тапшырмакмын. Бул тууралуу депутат Дастан Бекешов парламентте сүйлөп жатып билдирди.
Эл өкүлү бул пикирин "Этил спиртин жана алкоголдук продукцияны өндүрүүнү жана жүгүртүүнү мамлекеттик жөнгө салуу жөнүндө" мыйзамына өзгөртүүлөрдү киргизүү жөнүндө мыйзам долбоору каралып жатканда айтты.
"Айрымдар монополияны сактасак, продукциянын сапаты жакшы болот дешүүдө, алардын логикасы туура эмес. Мага кайсыл бир товар өндүрүү тармагында монополист болууга укук бергиле анда, мен сүйүнүп гана мандатымды тапшырам. Анын арты менен мага миллиарддаган акча түшөт. Сапатты монополия эмес, атаандаштык жакшыртат", — деди Бекешов.
Ал аталган мыйзам долбоору алкоголдук монополисттерди жоюп, буга чейин алкоголдук ичимдик тууралуу кабыл алынып, лобби катары өтүп кеткен мыйзамды жокко чыгарарын белгиледи.
