БИШКЕК, 13-дек. — Sputnik. Кыргызстандык Талгат Нурдинов Россиянын "Золотая блоха" сынагында баш байгеге ээ болгону сынактын расмий сайтында жарыяланды.
Жаш дизайнер Bruce Lee Dragon деп аталган чыгыш күрөштөрү боюнча клубга логотип тартып берген.
Долбоордун жетекчиси, Россиянын дизайнерлер бирикмесинин вице-президенти Виктор Сумароков "Золотая блоха" сыйлыгы 17 жыл ичинде төртүнчү жолу сыртка чыгып кетип атканын айтты.
"Бул жолу сыйлык Тянь-Шань тоолорунун этегинен орун алган Чүй өрөөнүнө кетти. Быйылкы чемпион катары Талгат Нурдиновду таптык. Ал тарткан логотип кытай иероглифтеринен туруп, ажыдаар деген сөздү түшүндүрөт. Дал ушинтип легендарлуу Брюс Лини аташчу, анын элеси логотиптин үстүңкү бөлүгүнө өтө кылдаттык менен жайгаштырылган. Талгатты куттуктайбыз!" — деди калыстар тобунун мүчөсү.
Анын айтымында, Талгаттын логотиби эмки жылдын күз айларына чейин долбоордун флагманы болуп кала бермекчи.
Ноябрь айында Нурдиновдун ушул эле эмгеги Кыргызстандагы жыл сайын өтүүчү DESIGN CUP-2016 сынагында жеңип чыккан.
