БИШКЕК, 6-дек. — Sputnik. Жаңы жылдан тартып Кыргызстанда улуттук валютанын IV сериясындагы жакшыртылган 200, 500 жана 1 000 сом номиналындагы банкноттору жүгүртүүгө чыгат. Бул тууралуу Sputnik Кыргызстан агенттигине Улуттук банк билдирди.
Маалыматта айтылгандай жаңы банкноттор жакшыртылып, 2016-жылы кайрадан чыгарылды.
IV сериядагы жакшыртылган банкноттор мурда чыгарылган банкноттор менен чогуу жүгүртүүдө болот.
Сом — Кыргызстандын улуттук валютасы. Жүгүртүүгө 1993-жылдын 10-майында берилип, жалпысынан төрт чыгарылыш болгон. Эң биринчи 1, 5, 20 сомдуктар менен 1, 10, 50 тыйындар 1993-жылдын жаз айларында чыгарылган. Экинчи чыгарылышы 1994-1995-жылдарга туура келген. Ал эми 1997-жылдан баштап үчүнчү, 2009-жылы төртүнчү чыгарылышы ишке ашкан.
