БИШКЕК, 31-окт. — Sputnik. Милиция катарын тазалоо керек. Кашкар Жунушалиевдин колунан келбесе, мен өзүм тазалайм. Бул тууралуу президент Алмазбек Атамбаев милиция кызматкерлеринин кесиптик майрамына карата жаңы батирлердин ачкычын тапшыруу аземинде билдирди.
Анын айтымында, укук коргоо органдарынын жетекчилигине келген министрлер тарабынан реформа жасалбастан, калыптанып калган нук менен иш алып барууда.
"Милициянын катарында "айбандар" көп. Аларды тазалаш керек. Кашкардын колунан келбесе, мен өзүм тазалайм", — деди президент.
Майрам жыл сайын 1-ноябрь күнү белгиленип келет. Милиционерлер үчүн көп кабаттуу үч үйдүн курулушу 2016-жылдын январь айында башталып, ага 437,9 миллион сом жумшалды. Бардыгы болуп 207 милиция кызматкери турак жай менен камсыздалды.
