Айыл өкмөт: элдин үшүн алган чөөлөр Алай тарапка ооп кетиши мүмкүн

БИШКЕК, 7-окт. —Sputnik. Оштун Кара-Суу районундагы Мамажан айыл аймагында мүрзөлөрдү казып, маркумдардын сөөгүн кемирген чөөлөр табылган жок. Бул тууралуу Жоош айыл өкмөтүнүн башчысы Жылдызбек Тиллабаев Sputnik Кыргызстан агенттигинин аймактык кабарчысына билдирди.

Эскерте кетсек, сентябрь айында Кара-Суу районуна караштуу Мамажан айылынын тургундары аймакта чөөлөр пайда болуп алар мүрзөлөрдү казып, маркумдардын сөөктөрүн жеп жатканын билдиришкен. Бул көйгөйдөн арылуу үчүн Жоош айыл өкмөтүнүн мал чарбасы, ветеринария боюнча жетектөөчү адиси Жолдубай Жоробаев аңчылык департаментине кайрылуу жолдогон. Мындан улам Кара-Суу райондук прокуратурасы чөөлөр тууралуу маалыматты иликтөөгө алган. 

Тиллабаевдин айтымында, жергиликтүү тургундар түнкүсүн 11 чөөнүн жүргөнүн көрүшкөн.

"Эки чөө жергиликтүү жашоочу Кенже Досбаев коюгон тузакка түшкөн. Ал эми калган чөөлөрдү атып жок кылуу үчүн Кара-Кулжадан атайын мергенчилерди чакырганбыз. Алар бир жума бою чөөлөрдү издешти. Бирок бирөө да табылган жок. Чөөлөр Мамажан айылындагы Машрап-Сай каналында байырлашкандыктан, ошол каналдын ичи менен Алай тарапты көздөй чыгып кеткен болушу мүмкүн", — деди айыл өкмөттүн жетекчиси. 

Ал учурда Мамажан айылынын жашоочулары мурункудай кооптонбой, тынчтанып калганын кошумчалады.