БИШКЕК, 15-сен. — Sputnik. Ош облусундагы Кара-Суу районуна караштуу Мамажан айылында чөөлөр мүрзөлөрдү казып, маркумдардын сөөктөрүн жеп жатканын жергиликтүү тургун Кенже Досбаев Sputnik Кыргызстан агенттигинин кабарчысына билдирди.
Анын айтымына караганда мүрзөлөрдүн сыртына чыгып калган адамдардын сөөктөрү жергиликтүү тургундардын жүрөк үшүн алып жатат.
"Сыртка чыккан сөөктөр биздин туугандардыкы да. Күн сайын аларды көмүү менен убарабыз. Түнкүсүн болсо айыл аралаган чөөлөр жаш бала ыйлаган сыяктуу үндөрдү чыгарып, жашоочулардын тынчын алууда. Мал-жандыкты жеп кеткен учурлар да бар", — деп билдирди Досбаев.
Айыл тургуну чөөлөрдү капканга түшүрүү аракеттери көрүлүп жатканын ырастады.
"Эки чөө кармадык. Алар аргындашкан түрүбү, айтор, кебетелери башкача экен. Арткы буттары узун, алдыңкы буттары менен куйругу кыска, мойну узун, жонунда карышкырдыкындай жалы бар экен", — дейт Досбаев.
Ал эми айыл башчы Жаныбек Бакыев Мамажан айылынын чет жакасында 39 түтүн жашагандыктан күн батары менен коркунуч күчөп жатканын билдирди.
Бул көйгөйдөн арылуу үчүн Жоош айыл өкмөтүнүн мал чарбасы, ветеринария боюнча жетектөөчү адиси Жолдубай Жоробаев аңчылык департаментине кайрылуу жолдогонун билдирди.
Анын айтымында, чөөлөрдү тез арада атып жок кылбаса, адамга кол салуу фактысы катталбай турганына эч ким кепилдик бере албайт.
