БИШКЕК, 2-окт. — Sputnik. Ысык-Көл облусунун Каракол шаарында бүгүн жааган кардан улам, бактардын бутактары сынып, электр зымдарын үзүп, шаардын айрым жерлери жарыксыз калды. Бул тууралуу калаа башчысы Данияр Арпачиев Sputnik Кыргызстан агенттигине билдирди.
Күнү бою жааган жаан, кечинде карга айланган. Бактын да жалбырактары түшө элек болгондуктан, суу кар аларга жармашып, оор болуп, бутактар сынган. Ошондой эле, электр зымдарына да суу кар жармашып, алар үзүлгөн.
"Азыр кыдырып жүрөбүз, беш бригада иштеп жатат. Төрөт үйүндө жарык өчүп калган, азыр аны күйгүздүк. Ошондой эле облустук ооруканага да жарык берилди. Калгандарын четинен күйгүзүп жатабыз, шаардын жарымы азыр күйүп калды. "Океан" деген дүкөн жакта трансформатор күйүп кетиптир, ал аймак эртең күйгүзүлөт", — дейт калаа башчысы Арпачиев.
Шаардын мэри Арпачиев азыр деле күн бүркөк экенин, кар себелеп жаап жатканын кошумчалады.
Эскерте кетсек, Кыргызгидромет 3-октябрга чейин өлкө боюнча аба ырайы кескин өзгөрүп, тоолуу аймактарда кар жаашы мүмкүндүгүн эскерткен.
