ЖКдагы фракция лидерлери Кадыржан Батыров боюнча билдирүү жасашат

БИШКЕК, 30-сен. — Sputnik. Жогорку Кеңештеги үч фракциясынын лидерлери Кадыржан Батыровдун ЕККУнун жыйынында сүйлөшү боюнча билдирүү жасай турганын парламенттин маалымат кызматы билдирди.

Иса Өмүркулов (КСДП), Өмүрбек Текебаев ("Ата Мекен") жана Бакыт Төрөбаев ("Өнүгүү — Прогресс") ЕККУнун Македонияда парламенттик күзгү ассамблеясынын жыйынына катышууда. Бул иш чара 29-сентябрдан 2-октябрга чейин болот. 

Эске сала кетсек, улут аралык араздашууну козутуп, 2010-жылкы Ош коогалаңын уюштурууга катыштыгы бар деп өмүр бою эркинен ажыратылган Батыров ЕККУнун Демократиялык институттар жана адам укуктары бюросунда сөз сүйлөгөн. Анда Конституциянын өзгөрүшүнө каршы экенин, анын өлкөдөн чыгып кетиши тууралуу жаңы кылмыш ишинин козголушуна жана учурда абакта отурган Азимжан Аскаровго чыккан соттун чечимине нааразычылыгын билдирген. 

Мындан улам КР ТИМи соттолгон кылмышкерге сөз берилгенин кескин сындап чыккан. Бул маселе Жогорку Кеңеште дагы катуу талкууланып, тышкы иштер министри Эрлан Абдылдаев катуу формада ЕККУнун жетекчилигене нааразычылык билдирген. Министр ошондой эле БУУнун Башкы ассамблеясынын жыйынында Батыровго сөз берүүнү Кыргызстанды сыйлабагандык катары сыпаттаган.

Андан сырткары, президенттик аппараттын жетекчисинин орун басары Мира Карыбаева ЕККУ Демократиялык институт жана адам укугу боюнча бюросунун "Дискриминация эмес жана толеранттуулук" деген темадагы 10-отурумунда Кадыржан Батыровго сөз берилгендигине нааразылык билдирип, залдан чыгып кеткен. 

Буга чейин "Фергана" агенттиги өзүнүн жеке булактарына таянуу менен КР ТИМи ЕККУнун статусу борбор программалык офиске алмашышы мүмкүндүгүн билдирген. ЖМКлардын маалыматына ылайык, мындай кадамга Кадыржан Батыровдун ЕККУнун жыйынында сөз сүйлөөсү себеп болгон. 

Аталган агенттикте жарыяланган документке ылайык, КР ТИМи бул уюмдун статусун алмаштыруу аракеттерин 2017-жылдын 1-январынан тарта баштоого ниеттенүүдө.