БИШКЕК, 27-сен. — Sputnik. Президенттик аппараттын жетекчисинин орун басары Мира Карыбаева ЕККУ Демократиялык институт жана адам укугу боюнча бюросунун "Дискриминация эмес жана толеранттуулук" деген темадагы 10-отурумунда Кадыржан Батыровго сөз берилгендигине нааразылык билдирип, залдан чыгып кетти. Бул туурасында президенттик аппараттын маалымат кызматы кабарлады.
ЕККУнун Демократиялык институт жана адам укугу боюнча бюросунун отуруму дүйшөмбү күнү Варшава шаарында өткөн.
Карыбаева Батыровдун 20-сентябрдагы ЕККУнун трибунасынан чыгып сүйлөгөнү аталган уюмдун Кыргызстанга урматтоосунун жоктугу жана кайгылуу окуяларга болгон таш боордук катары кабыл алынганын айтты. КР делегациясынын жетекчиси Батыровго кайрадан сөз берилгенде нааразычылык иретинде залдан чыгып кетти.
Батыровго КРдин Жогорку Соту тарабынан 2010-жылдагы улут аралык араздашуунун отун жаккандыгы үчүн сыртынан өмүр бою эркинен ажыратылган өкүм чыгып, кыргыз бийлиги ага издөө жарыялаган. Кыргызстан Батыров боюнча пикирин жакындагы БУУнун Башкы Ассамблеясынын 71-отурумунда дагы бир ирет билдирген.
