БИШКЕК, 24-сен. — Sputnik. Кайраттын жеңеринен үмүтүм үзүлүп баратканда калыстар тобу сахнага бурулушту. Бул тууралуу Sputnik Кыргызстан агенттигинин кабарчысына белгилүү ырчынын жубайы Элвира Примбердиева айтып берди.
Кечээ жума күнү Россиянын «Первый канал» телеканалы «Голос» долбоорунда ырдап чыккан кыргызстандык Кайрат Примбердиевди көрсөттү.
Элвиранын айтымында, Кайрат көптөн бери аталган долбоорго катышууну көздөп келген.
"Буга чейин бир нече ирет Москвага барып келдик. Кайрат кастингдин баарынан өтүп, августта биринчи этапка катышты. Кечээ эфирден көрсөттү", — деди ал.
Ырчынын жубайы акыр аягына чейин калыстар Кайратты тандар-тандабасын билбегенин белгиледи.
"Катышуучулар ырлардын кыска түрүн аткарып жатышты. Кайраттын ыры бүтөргө аз эле калганда Агутин менен Гагарина бурулушту. Аябай толкунданткан учур болду. Чыдабай ыйлап жибердим", — деди Элвира.
Эми Примбердиев кийинки турларда күч сынашат.
Ырчынын жубайы анын жолдошун колдоп жаткан бардык кыргызстандыктарга ыраазычылык билдирди.
"Голос" телешоусу ыр сынактарынан айырмаланып турган долбоор. Ал ырчыны көрбөй угуу, күч сынашуу, нокаут, чейрек финал, жарым финал жана финал сыяктуу бөлүктөрдөн турат. Финалга чыккан катышуучулар буга чейин тандап алган насаатчылары менен дуэт ырдашат. Долбоорго бу жолу Леонид Агутин, Дима Билан, Полина Гагарина жана Григорий Лепс калыстык кылууда.
