БИШКЕК, 20-сен. — Sputnik. Аскердик прокуратура Балыкчы шаарында снаряддын жарылышы жана андан каза тапкан аскер боюнча тергөөнү аяктап, иш сотко өттү. Бул боюнча Башкы прокуратуранын маалымат кызматы билдирүү таратты.
Үстүбүздөгү жылдын май айында Балыкчы шаарында жайгашкан 20636-аскердик бөлүгүндө снаряд жарылып, келишимдик негизде кызмат өтөгөн аскер каза тапкан. Башкы штаб мурда кабарлагандай, маркум снарядга таш ыргыта берген. Мындан улам кызып калган ок-дары жарылып кеткен.
Иш Кылмыш кодексинин 316 (байкабастыктан адам өлүмүнө алып келген жосун) жана 244-беренелери (ок-дарыларды жана жарылуучу заттарды сактоо боюнча милдетти талаптагыдай аткарбоо) боюнча козголгон.
Ал эми тергөөнүн жыйынтыгында "Эдельвейс" окуу борборунун мурдагы жетекчиси С.Т.га кесиптик милдеттерине шалаакылык мамилеси боюнча кылмыш иши козголду.
