БИШКЕК, 20-май — Sputnik. Ысык-Көл облусунун Балыкчадагы 20636 аскер бөлүгүндө снаряд жарылып, бир жоокер каза болду. Бул тууралуу Башкы штабдын маалымат кызматы билдирди.
Ага ылайык, каргашалуу окуя 19-майда болжол менен саат 20.30дар чамасында болгон. Контракттык кызматынын катардагы жоокери ок-дарыларды колдонууда коопсуздук чараларын кескин бузуп, жанында турган снарядды көздөй таш ыргыткан. Соккудан улам снаряд иштеп, жарылып кеткен.
Анын кесепетинен катардагы жоокер түрдүү жаракаттарды алып, Балыкчы шаарынын ооруканасына жеткирилген. Саат 21.30да ал каза болгон.
Башкы штабдын жетекчилиги тарабынан бул факты боюнча кызматтык иликтөө башталды. Учурда Балыкчы гарнизонунун аскердик прокуратурасы тарабынан иликтеп-териштирүү иштери жүрүүдө.
