БИШКЕК, 16-сен. — Sputnik. КМШга төрагалык кылуу 2017-жылы Россияга өтөт деп билдирди Алмазбек Атамбаев КМШ мамлекеттеринин кеңейтилген отурумунда.
Тар чөйрөдөгү жолугушуулардан кийин Атамбаев документтерге жазылган эрежелерге ылайык, КМШга төрагалык кылуу Россияга өтөрүн билдирип, РФ лидери Владимир Путиндин буга макулдугун сурады.
"Көрсөтүлгөн ишенимди сыймык катары көрөм",— деп жооп берди Путин. Анткен менен буга КРдеги Украина элчиси Николай Дорошенко каршылыгын кескин билдирди.
"Менде эки эскертүү бар. Бири — Россиянын төрагалык кылуусу боюнча. Алар эл аралык эрежелерди бузуп, Украина аймагын өзүнө каратып алды, бул деген аскердик чыр-чатакка алып келет. Ошондуктан, буга макул эмеспиз. Бешинчи пункт боюнча. 2020-жылда боло турчу эл каттоо. Ага Украина катышат. Эгерде эл каттоону Россия аннекция кылган аймактарда өткөрүп, элдин саны кошо эсептеп алса, анын жыйынтыгынын мааниси деле болбойт", — деди ал.
Путин буга пикирин айтты.
"Крымда болгон окуя — Украинадагы бир катар күчтөрдүн мыйзамсыз аракеттеринин майнабы. Ал мамлекеттик төңкөрүшкө жетти. Крым элдин каалоосунан улам кошулду. Бул мындай жагдайдагы эл аралык сот иштеринин практикасында БУУнун уставына жана эл аралык нормаларга каршы келбейт", — деди Путин.
Россиялык лидер тилекке каршы, Украина КМШнын уставына кол койбогондугун эстетти жана уюмдун иштери боюнча өзүнүн сунуштарын киргизе албай тургандыгын айтты.
