БИШКЕК, 16-сен. — Sputnik. Ош шаарындагы борбордук соода дүң базардын жабылышына каршы соодагерлер нааразылык акциясына чыгышты.
Маалым болгондой Ош шаардык мэриясы дүң базардын сатуучуларын үч күндөн бери соода жайына киргизбей тосмолорду коюп жатышат. Буга 13-сентябрда базардын жашылча-жемиш сатуучу тарабындагы "Тешик-Таш" деп аталган жеринде кырсык болуп 52 жаштагы аялдын каза болушу себеп болууда.
Таластан келген Алмагүл аттуу соодагер базар жабылып калгандыктан банкрот болгондугун билдирди.
"Мен төрт тонна помидор жүктөп келген элем. Бирок милиция кызматкерлери базарга киргизбей койгондуктан бардыгы чирип кетти", — деп кейиди соодагер.
Ал эми аталган базардын ээси бул жайды мэриянын өтүнүчү менен көчөдөгү сатуучулар үчүн бул жерди кредитке 2 миллион 800 миң сом алып базар кылганын, бардык шарттар түзүлгөнүн белгиледи.
"Үстү калкаланган, канализация тарттырып, ажатканаларды салып, 2,5 жылдан бери иштетип жатканбыз. Бул жерди 150гө чукул адам киреге алып иштетип, ай сайын салыгын төгүп турчу элек. Бир нече күн жок болдум эле, базарга автоунаа киргизбейбиз деп жатышат дегенинен келдим. Ушундай жагдай түзүлүп жатыптыр", — деди.
Шаар жетекчилиги соодагерлер тоок базарына көчүрүлгөнүн билдирген. Бирок сатуучулар анда эч кандай шарт жок экенин айтып нааразы болушууда.
