БИШКЕК, 13-сен. — Sputnik. Ош шаарындагы базардын чыга беришинде автоунаанын айдоочу 52 жаштагы аялды тебелетип алып, ал ооруканага жетпей каза болгон. Бул туурасында Ош шаардык ички иштер башкармалыгынын маалымат катчысы Замир Сыдыков кабарлады.
Окуя Оштун борбордук базарынын жашылча-жемиш сатуучу тарабындагы "Тешик-Таш" деп аталган жеринде болгон.
"Кырсык болжол менен саат түшкү 15:00дө болгон. 23 жаштагы айдоочу Mercedes-Benz Sprinter үлгүсүндөгү автоунаасы менен өзүнө тиешелүү жүктөрдү алып өйдөлүштөн чыгып бара жатканда тормоздук системасы кармабай, артка кеткен. Анын кесепетинен Ош шаарындагы Жапалак айылынын 52 жаштагы тургунун тебелетип алган", — деп билдирди Сыдыков.
Аял алган жараатынын улам ооруканага жетпей каза болгон.
Сыдыковдун айтымында, бул факты боюнча автотехникалык экспертиза дайындалып, кырсыктын себептери аныкталууда.
Ал айдоочу автоунаасы менен өйдөгө чыгып бара жатып, автоунаанын токтотуучу системасы кармабай калгандыктан, жарандарды сактанууга чакырып кыйкырганын айтты.
"Күбөлөр айдоочу артка кетип бара жатканда "качкыла" деп кыйкырганын айтышты. Эл эки жакка чыга берип, ал эми жакынкы арада той өткөрөм деп камданып, колунда жүктөрү менен жүргөн аял качканга үлгүрбөй калгандыгын белгилешти", — деди Сыдыков.
Маалымат катчы бул факты боюнча кылмыш иши козголуп, айдоочу убактылуу кармоочу жайга эки айга киргизилгенин кошумчалады. Ага Кылмыш Кодексинин 282-беренеси (автотранспортту туура эмес пайдаланып, анын натыйжасында адам өлүмүнө алып келген) менен иш козголду.
