БИШКЕК, 9-сен. — Sputnik. Жалал-Абад облусунун Аксы районундагы Үңкүр-Тоодогу телемунарадан Өзбекстандын милициясы тарабынан кармалып кеткен төрт кыргызстандык бошотулду. Бул тууралуу Мамлекеттик чек ара кызматы билдирди.
Маалыматка ылайык, Кыргызстан менен Өзбекстандын делегациялары Ала-Бука районундагы Баймак аймагында жолугушкан.
"Эки тараптын делегациясынын курамында чек ара кызматынын жана укук корго органдарынын өкүлдөрү болгон. Сүйлөшүүнүн жыйынтыгында буга чейин кармалган жарандар кыргыз тарапка өткөрүлүп берилди. Учурда алар үйлөрүнө келишти", — деп айтылат маалыматта.
Өзбекстандын президенти Ислам Каримов каза болуп, аза күтүүгө байланыштуу кармалган кыргызстандыктарды бошотуу боюнча сүйлөшүүлөр убактылуу токтотулган эле.
Ал эми Жалал-Абад ОИИБдин кызматкери кармалган жарандардын баарынын ден соолугу жакшы экенин кошумчалады.
ОИИБдин өкүлү кармалган жарандар өкмөткө жана президентке ыраазчылык билдиргенин кошумчалады.
