БИШКЕК, 3-сен. — Sputnik. Президент Алмазбек Атамбаев II Дүйнөлүк көчмөндөр оюндарынын ачык деп жарыялады.
"Көчмөндөр оюндарынын негизги идеясы - ар кыл элдер менен маданияттарды жакындаштыруу. Биз, көчмөндөр үчүн бул майрам түпкү угутубузга, ата-бабаларыбыздын өткөн жашоосуна кайрылып келүү. Балдарыбызга, бүткүл дүйнөгө көчмөндөр дөйнөсүнүн руханий байлыгын алып чыгуу, тааныштыруу",— деди Атамбаев.
Ал көчмөндөр оюндарынын программасына спорттук таймашуулар гана эмес, элдин маданиятын, жашоо-тиричилигин, салтын жана көчмөн философиясын тааныштыруучу иш-чаралар киргизилгендигин кошумчалады.
"62 өлкөнүн чабандестерин тосуп жатканыма сыймыктанам. "Конок менен кошо үйгө кут кирет" деген сөз бар. Көчмөндөрдүн маданият жандандырып жатканыбызга башка өлкөлөр суктанып жатышат. Дүйнөлүк көчмөндөр оюндарын өткөрүүдө бизди колдогон бардык өлкөлөрдүн жетекчилерине ыраазычылык билдирем", — деди Атамбаев.
Ал алдыдагы оюндарда калыстык жана адилеттик жеңиши керектигин кошумчалады.
Көчмөндөр оюндары 3-8-сентябрь күндөрү Ысык-Көлдө өтөт. Ага 62 өлкөнүн спортчулары келген жана оюндарды чагылдыруу үчүн 35 өлкөнүн 487 журналисти катталган.
