БИШКЕК, 3-сен. — Sputnik. Кыргызстан Көчмөндөр оюндарына мынчалык деңгээлде даярданат деп күткөн эмеспиз. Мындай пикирин Польшадан келген спортчу Анна Левандовска билдирди.
Анын айтымында, Польшадан алты спортчу келген.
"Биз үч күн мурун келип, бул жактагы курулуштарды жана даярдыктарды көрүп таң калып жатабыз.Чынын айтсам, эл аралык иш-чара болуп жаткандыктан жогорку деңгээлде уюштуруу өтө кыйын. Андыктан мынчалык мыкты болот деп күткөн эмеспиз", — деди Левандовска.
Спортчу Польшадан келгендер жок дегенде үч медалдан үмүт кылып жаткандыгын жашырган жок.
Ал эми Россиядан келген спортчулар Туяра Орлова менен Марина Федоренко Кыргызстанга экинчи ирет келип жаткандыгын айтышты.
Эл аралык деңгээлдеги иш-чара 8-сентябрга чейин уланат.
Sputnik Кыргызстан маалымат агенттиги жана радиосу Дүйнөлүк көчмөндөр оюндарынын расмий медиаөнөктөшү болуп саналат.
