БИШКЕК, 1-сен. — Sputnik. Москва шаарындагы өрт чыккан басмакана төрт жылдан бери текшерүүгө алынган эмес. Бул тууралуу Россиянын Башкы прокуратурасы расмий сайтына жарыялады.
27-август күнү Москва шаарынын түндүк-чыгыш аймагындагы Алтуфьевск шоссесинде жайгашкан "Печатный экспресс" басмаканасында өрт чыгып, анда иштеген Кыргызстандын 14 жараны каза болгон. Алар 17ден 45 жашка чейинки кыз-келиндер болуп чыкты. Дагы үчөө оор абалда ооруканада жатат.
Ал эми каза болгондордун сөөгү кечээ, 30-август күнү мекенине жеткирилди.
"Өрткө каршы кызматы Алтуфьевск шоссесинде жайгашкан "Печатный экспресс" басмаканасын акыркы жолу 2012-жылдын август айында текшерүүгө алгандыгы, андан бери бир дагы жолу текшерүү болбогондугу аныкталды", — деп айтылат маалыматта.
Ал эми каза болгондордун экөөсүнүн гана документтери талапка жооп берсе, калган 12синин каттоодон өтүү боюнча документтери мыйзамсыз экендиги аныкталган.
Учурда тергөө амалдары уланып жатат.
