БИШКЕК, 27-авг. — Sputnik. Үркүндүн 100 жылдыгына арналган мемориалдык эстелик Ысык-Көл облусунун борбору Каракол шаарына орнотулду. Бул туурасында Sputnik Кыргызстан агенттигине эмгектин автору, художник-скульптор Марлен Бакатиев билдирди.
Анын айтымында, долбоорду президент Алмазбек Атамбаев өзү көрүп жактырган. Ага кеткен каражаттын басымдуу бөлүгүн мамлекет башчынын фондусу мойнуна алып, 2, 5 миллион сом бөлгөн. Жалпысы монументке 4,5 миллион сом жумшалып, калган каражатты Ысык-Көлдү өнүктүрүү боюнча фондусу берген.
Эстеликте 100гө чукул караан турат, ал эми таяк көтөрүп турган өспүрүм менен абышка көзгө дароо урунат.
Автордун айтымында, мемориал жезден жасалган, туурасы 16 метр, узуну 4,5 метр.
"Эстеликтеги башкы эки элес – таяк кармап турган бала менен абышка. Аксакалдын оозунан "Токтогула!" деген сөз чыккан сыяктуу. Ал эми баланын колундагы таяк элдин куралсыз болгонун көрсөтүп турат",— деп айтып берди автор.
Буга чейин трагедиялуу Үркүндүн 100 жылдыгына карата атайын мемориалдын эскизине сынак жарыяланган.
1916-жылы улуттук-боштондук күрөш чыгып, ал көптөгөн кыргызстандыктардын өлүмүнө алып келген. Бул кайгылуу окуя эл арасында Үркүн деген ат менен калган.
