БИШКЕК, 12-авг. – Sputnik. Бишкекте "Эненин чындыгы — 1916-2016" деген аталыштагы китептин бет ачары өтөт.
Уюштуруучулардын айтымында, чыгарма тарыхый документтер менен түрк чалгынын агенти Адил Хикметтин мемуарларынын негизинде жазылган. Китеп кыргыз-түрк "Манас" университетинин китепканасында.
Маалыматка ылайык, Осмон империясынын жашыруун агенттеринин жашоосун чагылдырган чыгарма Кыргызстан менен Россия эли үчүн каргашалуу окуяны таптакыр башка өңүттө баяндайт. Китептин автору Үркүндөн 100 жыл өткөндөн кийин да окуяны эскерүү оор айыптоолор менен коштолуп келерин, бирок каргашанын себепчилери эчак жок болгонун айтат.
"Китеп 1916-жылдагы окуянын айланасында орун алган бир топ чындыкка коошпогон ойлорго чекит коет деп ишенем", — деди Дегенбаева.
Уюштуруучулардын айтымында, иш-чарага Алай ханышасы Курманжан датканын урпактарынын катышуусу күтүлүүдө.
