БИШКЕК, 26-авг. — Sputnik. Россиядагы мигранттар Кыргызстандын эгемендүүлүк майрамын 27-август күнү Москва шаарында тосушат. Бул тууралуу "РДВ" агенттиги иш-чаранын уюштуруучусу Рыскүл Сматовага шилтеме берүү менен жазып чыкты.
Ага карата "Россия" мамлекеттик концерттик залында кыргыз эстрада ырчыларынын коштоосунда концерт өтөт. Анда Гүлжигит Сатыбеков, Айпери Кубик кызы, Абдылда Иманкулов, Добр жана башка ырчылар атайын шоу-программа тартуулашат.
"Артисттердин гонорары 2000 долларды түздү. Мындай иш-чараны жөнөкөй мигранттар уюштуруп жатат. Россиянын булуң-бурчундагы кыргыздарды чогултуу үчүн социалдык тармактар аркылуу жарнамалар таркатылды", — деп билдирген Стамова.
Концертке кирүү акысы 500 рублди түзөт.
Эгемендүүлүк мааракеси дипломатиялык өкүлчүлүктө дагы майрамдалат. Анда диаспоралардын лидерлери, жаштар уюмдарынын өкүлдөрү жана аксакалдар чогулат.
