БИШКЕК, 24-авг. — Sputnik. Кыргызстандын чек ара кызматы буга чейин өзбек аскерлери тарабынан кармалып кеткен төрт кыргызстандык жаранды бошотуу талабын коюуда. Бул тууралуу Мамлекеттик чек ара кызматы билдирди.
24 Баш оона 2016, 13:40
Эскерте кетсек, буга чейин кыргыз-өзбек чек арасындагы талаштуу жерде жайгашкан Үңкүр-Тоого коңшу өлкөнүн жети милиция кызматкери тик учак менен конгон. Мындан кадамды түшүндүрүү талабына өзбекстандыктар буга чейин кыргыз чек арачылар тарабынан кармалган өзбек милиционерин бошотуу жана Орто-Токой суу сактагычынын айланасындагы милиция постторун алуу талабын коюшкан. Сүйлөшүүлөрдөн соң аталган кызматкер бошотулган.
Бүгүн эртең менен коңшу өлкөнүн чек арачылары Кербен шаарындагы телемунарада иштеген төрт кыргызстандык адистерди кармап кетишкени тууралуу маалымат тараган.
Өзбекстандык чек арачылар аталган жарандар атайын операциянын жүрүшүндө кармалганын, учурда алар Жаңы-Коргон РИИБинде экенин билдиришкен.
Ушу тапта КРдин Чек ара кызматы негизсиз кармалган кыргызстандыктарды бошотуу аракетин көрүп жатат.
