БИШКЕК, 24-авг. — Sputnik. Президент Алмазбек Атамбаев Тышкы иштер министри Эрлан Абдылдаевди, президент аппаратынын тышкы саясат бөлүмүнүн башчысы Сапар Исаковду кабыл алды. Бул тууралуу өлкө- башчынын маалымат кызматы билдирди.
Мамлекет башчысы кыргыз эли өзүбүздүкү деп эсептеген бир катар жерлерди мурдагы президенттер менен кызмат адамдары коӊшулардыкы деп тааныган фактылар мезгил-мезгили менен ачыкка чыгып жатканын белгиледи.
"Чегинген" жерлер боюнча маалыматтарды чиновниктер бекем жашыргандыктан, алар элге гана эмес, мага да белгисиз болуп келген. Ошол мезгилде бийлик өкүлдөрү кол койгон мындай "келишимдер" тууралуу чындыкты эл билүүгө тийиш. Ал документтер ратификациялана элек жана белгиленген тартипте мыйзамдуу күчүнө кире элек болсо да, эл аралык укуктун ченемдерине ылайык, алар келечектеги макулдашуулардын негизин түзүп калгандыктан, Кыргызстандын улуттук таламдарын талашууга чоӊ тоскоол болууда", — деди Атамбаев.
Жолугушуу соңунда өлкө башчы чек ара маселеси боюнча эл аралык келишимдерди, кол коюлган протоколдорду, меморандумдарды тыкыр текшерип чыгуу тапшырмасын берди.
