БИШКЕК, 23-авг. — Sputnik. Чек арадан мыйзамсыз өттү делген өзбек милиция кызматкери Өзбекстанга кайтарылды. Бул тууралуу Чек ара кызматы билдирди.
23 Баш оона 2016, 11:00
Эске сала кетсек, Аксынын борбору Кербен шаарындагы Үңкүр-Тоого Өзбекстандын 7 милиция кызматкери тик учак менен келип конгон. Бул боюнча эки мамлекеттин тийиштүү органдары жолугуп, сүйлөшүүлөрдү жүргүзгөн. Кыргыз тарап жасалган кадамдын чоо-жайын түшүндүрүүнү талап кылса, өзбек тарап буга чейин кармалды делген милиция кызматкерин бошотууну жана Орто-Токой суу сактагычындагы милиция постторун алып салуу боюнча шарт койгон.
"КРдин Чек ара кызматынын жетекчиси Абдукарим Алимбаев Өзбекстандын Улуттук коопсуздук кызматынын жетекчисинин орун басары, Чек ара кызматынын командири Рустам Эминжанов менен сүйлөшкөн. Сүйлөшүүлөрдүн арты менен 22-аагуст күнү саат 21:30да өзбек милиционери өткөрүлүп берилди", — деп айтылат маалыматта.
Анткен менен Үңкүр-Тоодогу Өзбекстандын милиция кызматкерлери кете элек. Алар Орто-Токой суу сактагычындагы милиция постторун алып салуу боюнча талап коюп жатышат.
