БИШКЕК, 23-авг. — Sputnik. Үңкүр-Тоого тик учак менен конгон Өзбекстандын милиция кызматкерлери кыргыз жарандарын барымтага алды деген маалымат чындыкка дал келбейт. Бул тууралуу Чек ара кызматынын жетекчиси Абдикарим Алимбаев билдирди.
Буга чейин жалпыга маалымдоо каражаттары жергиликтүү тургундарга шилтеме берүү менен өзбекстандык милиционерлер теле мунарадагы кызматкерлерди барымтага алганын жазып чыгышкан.
"Биз телемунаранын кызматкерлери менен телефондон байланыштык. Кадимки тартипте эле иштеп жатышат. Аларга өзбек милиция кызматкерлери эч кандай тоскоолдук көрсөткөн эмес. Учурда абал тынч. Буга чейин коюлган талаптар боюнча сүйлөшүүлөр жүрүүдө", — деди Алимбаев.
Сүйлөшүүлөр учурунда кыргыз тарап өзбек кесиптештеринен эмне үчүн бул кадамга барганын түшүндүрүп берүүнү талап кылса, алар буга чейин чек арадан мыйзамсыз өткөн өзбек милиция кызматкерин бошотуу жана Орто-Токой суу сактагычындагы милиция постторду алып салуу шартын койгон.
