БИШКЕК, 22-авг. — Sputnik. Аксыда абал тынч. Бул тууралуу Sputnik Кыргызстан агенттигине жергиликтүү тургун Шекербек Камчыбек уулу билдирди.
Эске сала кетсек, бүгүн түшкө маал Өзбекстандын 7 милиция кызматкери Кербендеги Үңкүр-Тоого тик учак менен конгон.
"Учурда эч кандай ызы-чуу жок. Абал тынч. Маселе дипломатиялык жол менен чечилет деп отурабыз", — деди Шекербек Камчыбек уулу.
Буга чейин Аксыдагы Үңкүр-Тоо Өзбекстандын аймагы деп тааныган протоколдун көчүрмөсү интернет булактарына таркаган. Аталган протокол 2015-жылдын 11-ноябры менен белгиленип, анда "Өзбекстандын аймагында жайгашкан "Кербен-24" телерадио мунарасын башка жакка көчүрүү үчүн жер караштыруу" деген пункту көрсөтүлгөн.
Аталган маселени тергөө бүгүнкү күнгө чейин аягына чыкпай келет.
