Ылай, суу, куткаруучулар: Чолпон-Атада селдин кесепеттери жоюлуп жатат

Жазылуу
Окуя болгон жерде Өзгөчө кырдаалдар министрлигинин 60 куткаруучусу иш алып барууда.

Ушу тапта Ысык-Көлдүн Чолпон-Ата шаарында сел кырсыгынын кесепеттерин жоюу иштери уланып жатат. 

Жамгыр. Архив - Sputnik Кыргызстан
Шашылыш билдирүү: катуу жааган жамгырдан улам сел жүрөт
Эскерте кетсек, кечээ, 16-август күнү түшкө маал нөшөрлөгөн жамгырдан жаралган сел 70ке чукул турак жайдын короосун жана "Рух-Ордо" комплексин каптап кеткен.

Куткаруучулар үйлөр менен короо-жайларды ылай-баткактан тазалап, жабыркаган тургундардын буюм-тайымдарын башка жакка көчүрүүгө жардам берип жатышат. Мында негизинен узундугу 1300 метрге жеткен Тогуз-Булак сайына жакын жайгашкан жашоочулар жабыр тарткан.

ӨКМдин Ысык-Көл облусу боюнча башкармалыгынын жетекчиси Замир Жумагазиевдин айтымында, 2010-жылы каналдын курулушу боюнча долбоор иштелип чыккан. Аны ишке ашыруу үчүн бактарды кыйып, канализация, таза суу жана электр чубалгылар боюнча маселе чечилиши керек болчу.

"Бирок айрым жашоочулар Тогуз-Булак сайына жакын жерге, канал казылуучу чекке дарбаза тургузуп, курулуштарды салып алышкан. Бул маселелер чечилмейинче канал куруу мүмкүн эмес. Ал жерге техника өтпөйт", — деди Жумагазиев. 

Ал 2013-жылы каналдын 300 метри гана тазаланганын, андан кийинки иштерге жергиликтүү тургундар уруксат бербей койгону үчүн токтоп калганын белгиледи. 

Учурда абалга ӨКМ башчысынын орун басары Нурбек Сыдыгалиев көзөмөлдөп турат. Мындан тышкары, тиешелүү кызматтар келтирилген зыянды эсептеп, мыйзамсыз курулуштарды аныктоодо.

Жаңылыктар түрмөгү
0