БИШКЕК, 17-авг. — Sputnik. Ысык-Көлдүн Чолпон-Ата шаарындагы сел 70 үйдү каптаган. Бул тууралуу ӨКМ билдирди.
Кечээ, 16-август күнү катуу жааган жаандан улам Чолпон-Ата шаарында сел жүрүп, борбордук көчөнү жана "Рух Ордо" маданий борборун каптап кетти.
Табигый кырсыктан улам жаралган кырдаалды өкмөттүн Ысык-Көлдөгү ыйгарым укуктуу өкүлү Асхат Акибаев жеке көзөмөлүнө алган.
"Болжолдуу түрдө 70 турак жайды жана бир канча кафелердин короосун сел каптаган. Бул боюнча ӨКМдин өкүлчүлүгү чукул жыйын куруп, 60 куткаруучу бөлүнгөн. Мындан сырткары, 66 жай тургун, 4 атайын техника жана 10 милиция кызматкерлери жардамга келген", — деп айтылат маалыматта.
Өзгөчө кырдаалдар министринин орун басары Нурбек Сыдыгалиев абалды жеринен көзөмөлдөп жатат.
"Көпчүлүк короо-жайларда арык казылган эмес. Ошондуктан суу агып кетпестен, турак жайларды каптаган. Абалды көзөмөлдөп, биринчи пенисонерлердин короолорун тазалап жатабыз", — деди Сыдыгалиев.
Короо-жайларды тазалоо иштери бүгүн, 17-августта да уланат.
