БИШКЕК, 12-авг. — Sputnik. Бүгүнкү күндө Балыкчы — Корумду жолуна убакыттын тардыгынан бир катмар болуп төшөлгөн асфальт жолдон жеңил автоунаалар гана өтөт. Бул туурасында Транспорт жана жолдор министрлигинен Sputnik Кыргызстан маалымат агенттигине билдиришти.
Ал эми Көчмөндөр оюндарына даярдык көрүү максатында каттаган оор жүктүү автоунаалар али жасала элек, экинчи тилке менен каттайт.
"Бир катмар асфальт төшөлгөн жолдон жеңил автоунаалардын өтүүсү гана каралган, себеби андай оордукту көтөрө алат. Ал эми оор жүктөрдү, күйүүчү жана майлоочу майларды ташыган автоунаалар али оңдоло элек, экинчи тилке менен өтөт", — деди министрликтин өкүлү.
Ал аталган аймактарда мындай эрежелерди жөнгө салып, көзөмөлгө алган Кайгуул жана жол кызматтары иштеп турарын кошумчалады.
"Тамчы" эл аралык аэропорту жайгашкан аймактын 47-чакырымынан тарта 62-чакырымга чейинки жол салынып бүттү. Учурда дагы Сары-Ой айылы аркылуу өткөн жолду 69-чакырымына чейин жасоого даярдык көрүлүп жатат", — деди министрликтин өкүлү.
Анын маалыматында аталган аймактагы иштер 15-20-августтарда бүтөт.
"Негизи Көчмөндөр оюну башталганга чейин иштер улана берет, кайсыл жерге келсек, оюн башталганда ошол жерден токтотобуз. Калган аралыктагы жол Көчмөндөр оюнунан кийин жасалат", — деди ал.
Балыкчы — Корумду унаа жолунун Чок-Талдан Чоң-Сары-Ой айылына чейинки 18 чакырым жолу оңдолуп бүттү. Андан сырткары, жолдун 81-83-чакырымын түзгөн Чолпон-Ата шаарындагы ат майданы, айтылуу Раппопорт аллеясы жайгашкан аймакта жолду оңдоо иштери жүрүүдө.
