Конституциянын жаңы долбооруна ылайык премьердин позициясы бекемделет

БИШКЕК, 30-июл. — Sputnik. Конституцияга киргизүү үчүн сунушталган айрым өзгөртүүлөр коомдук талкууга коюлду. 

Жаңы долбоорду КСДП, "Республика — Ата-Журт", "Өнүгүү — Прогресс" жана "Кыргызстан" фракциялары сунуштаган.

Конституциянын долбоорунда адамдын эң жогорку баалуулуктары жазылган: адам жана анын жашоосу, бактылуулукка умтулуу, өлкөнүн көз карандысыздыгы, мамлекеттин бүтүндүгү, элдин биримдиги жана башкалар бар.

Ошондой эле сот реформасын шарттай турчу бир катар нормалар жазылган. Ага ылайык сотторду кызматтан алуу же убактылуу четтетүүнү Соттордун кеңеши эмес, дисциплинардык комиссия аткарат. Азыркы учурда соттордун кеңешине бир гана соттор кирет, бул алардын өз ишине жоопкерчиликтүү мамиле кылышына тоскоолдук жаратышы мүмкүн. Сот болом деген талапкерлер кызматты аркалап турган учурда кат алышуу, телефондук сүйлөшүү жана башка байланыштарын тийиштүү кызматтардын текшерүүсүнө макулдугун берүүгө милдеттүү.

Ошондой эле премьер-министрдин позициясын бекемдөө сунушталган. Ага ылайык, ал жергиликтүү администрациянын башчыларын кызматка бекитип, андан алуу укугу каралган. Бүгүнкү күнү ал мындай иштерди жергиликтүү кеңештин сунушу менен ишке ашырат. Андан сырткары премьерге өкмөт мүчөлөрүн кызматтан алуунун жөнөкөйлөтүлгөн ыкмасы берилет.