БИШКЕК, 28-июл. — Sputnik. "Республика — Ата-Журт" фракциясынан мандат алган Жыргалбек Саматовдун ордуна Болотбек Ибраимжанов депутат болуп келди. Бул тууралуу Борбордук шайлоо комиссиясы (БШК) билдирди.
Эскерте кетсек, 22-июль күнү Жогорку сот БШКнын Саматовду мандатынан ажыраткан чечимин мыйзамдуу деп тапкан.
Маалыматка ылайык, БШК үстүбүздөгү жылдын 8-июль күнү "Республика — Ата-Журт" фракциясынын депутаты Саматовду мандатынан ажыраткан. Буга Саматовдун Россиянын жарандыгы бар экени тастыкталганы негиз болгон.
Ал ортодо Саматов БШКнын чечимине макул эместигин айтып, Биринчи Май райондук сотуна арыз жазган. Ишти карап чыккан сот БШКнын чечимин күчүндө калтырган. Ага да макул болбогон Саматов Жогорку сотко кайрылып, соттук коллегия биринчи инстанциянын чечимин колдогон.
Саматов буга чейин да бир канча ирет мандатынан ажыраган.
