БИШКЕК, 22-июл.— Sputnik. Жогорку сот БШКнын Жыргалбек Саматовдун мандатынан ажыраткан чечимин мыйзамдуу деп тапты. Бул тууралуу Борбордук шайлоо комиссиясынын (БШК) маалымат кызматынан билдиришти.
Маалыматка ылайык, БШК үстүбүздөгү жылдын 8-июль күнү "Республика-Ата-Журт" фракциясынын депутаты Жыргалбек Саматовду мандатынан ажыраткан. Буга Саматовдун Россиянын жарандыгы бар экени тастыкталганы негиз болгон.
Ал ортодо Саматов БШКнын чечимине макул эместигин айтып, Биринчи Май райондук сотуна арыз жазган. Ишти карап чыккан сот БШКнын чечимин күчүндө калтырган. Ага да макул болбогон Саматов Жогорку сотко кайрылып, соттук коллегия биринчи инстанциянын чечимин колдогон.
Эске сала кетсек, буга чейин да Саматов бир канча ирет мандатынан ажырап, кайра кайрып алган.
