БИШКЕК, 24-июл. — Sputnik. Казакстандын Атырау облусунда 1,5 миңге чукул уй белгисиз ылаң менен жабыркоодо. Бул тууралуу Новости – Казакстан агенттиги "Ак жайык" басылмасына таянуу менен жазып чыкты.
Маалыматка ылайык, аталган ылаң менен Россия, Чеченстан жана Дагестанда уйлар катталган.
"Буга чейин уйлар мындай оорулардан жабыркаган эмес. Биз бул эмне илдет экенин жана канчалык коркунуч жаратаарын азырынча биле элекпиз. Болгону ага чалдыккан уйларды бөлөк кармап жатабыз", — дейт жергиликтүү жайшоочулардын бири.
Аймактык ветеринария бөлүмүнүн башчысы Алимбай Абдирахмандын билдиргенине караганда, илдетке чалдыккан уйлардын каны изилдөөгө жөнөтүлгөн. Учурда ылаңдаган малды дарылоо үчүн 120 миң бицилин, 600 нетокс жана инфекция жок кылуучу 92 литр заттар алып келинип, дарылоо иштери жүрүүдө.
