БИШКЕК, 15-июл. — Sputnik. Түркиядан транзит аркылуу Кыргызстанга келе жаткан 30га жакын жүк ташуучу унаалар Белоруссия менен Россия чектешкен чек арадан өтө албай турат. Бул тууралуу Соода өнөр жай палатасынын төрагасы Талантбек Маткерим уулу билдирди.
Анын айтымына караганда жүк ташуучу унаалар чек арада 10 күндөн бери өтө албай турушат.
"Россиянын чек ара кызматкерлери Украинадан Кыргызстан менен Казакстанга транзит аркылуу кетүүчү товарларга тыюу салган президенттин жаңы указына таянып жатышканын билдирген. Алар айдоочуларды Украинага кайтууга сунуштап жатышат. Бирок жол тыгыны ушунчалык чоң болгондуктан, эки күн убакыт керектелет", — деп Маткерим уулу билдирди.
Анын айтымына караганда Украина унаалардын артка кайтуусуна тыюу салуу менен көйгөйдү ого бетер курчутуп салган. Ал эми айдоочулардын маршрутун өзгөртүү кошумча чыгымдарды талап кылат.
"Товарларды Грузия аркылуу алып өтүү бизнесмендерди кошумча 4,5 миң долларга чыгым тарттырып, жаңы бажы төлөмдөрүн төлөөгө туура келет", — деп белгиледи Маткерим уулу.
Ал билдиргендей түрк товарлары жүктөлгөн вагондор дагы токтотулган. Анын так көлөмү тууралуу азырынча маалымат жок.
