БИШКЕК, 15-июл. — Sputnik. Жаштар, дене тарбия жана спорт боюнча мамлекеттик агенттиктик художниктер, көл өнөрчүлөр, бедизчилер арасында көк бөрүдө тартылуучу улактын муляжына конкурс жарыялады. Бул тууралуу аталган ведомствонун маалымат кызматы билдирди.
Жарыяланган конкурста жасалма улактын салмагы 32-35 килограмм болуп жана ал 16 оюнга чыдагыдай жасалышы керек деген талаптар коюлган. Сунушталган жасалма улактардын бардыгынын оюнга чыдамдуулугун сынап көрүшөт. Конкурстун жеңүүчүсүнө 50 миң сом берилмекчи.
Буга чейин көк бөрү оюнунда чыныгы улак эмес, муляжды тартуу сунушу коомчулукта түрдүү пикирлерди жаратып, социалдык тармактарда кызуу талкууга жем таштаган.
Майдын соңунда Спорттун улуттук түрлөрүн өнүктүрүү дирекциясынын жетекчиси Алмазбек Касенов көк бөрү боюнча мелдеште чыныгы улак тартыларын айткан эле.
Sputnik Кыргызстан маалымат агенттиги жана радиосу 2016-жылы өтө турган Экинчи Дүйнөлүк көчмөндөр оюндарынын расмий өнөктөшү.
