БИШКЕК, 12-май — Sputnik. Быйыл экинчи жолу өтө турчу Дүйнөлүк көчмөндөр оюнунда көк бөрү боюнча мелдеште чыныгы улак тартылат. Бул тууралуу Спорттун улуттук түрлөрүн өнүктүрүү дирекциясынын жетекчиси Алмазбек Касенов маалымат жыйында билдирди.
Белгилей кетсек, буга чейин көк бөрү оюнунда чыныгы улак эмес, муляжды тартуу сунушу коомчулукта түрдүү пикирлерди жаратып, социалдык тармактарда кызуу талкууга жем таштаган.
Дүйнөлүк көчмөндөр оюну сентябрь айында Ысык-Көлдө өтөт.
Касенов муляж Улуу Жеңиштин урматына арналган көк бөрү мелдешинде пайдаланылганын айтты.
"Биз муляжды сынап көрдүк, аны көкбөрүчүлөр биринчи оюнда тартып көрдү. Оюнчулар бир аз оңтойсуз болгонун айтып, бирок ага көнсө болот дешти. Биз муляжды дагы өркүндөтүп, анын ыңгайлуулугун арттырабыз", — деди ал.
Ал эми КРдин Көк бөрү федерациясынын аткаруучу директору Султан Бекташев эгер көк бөрү оюнун өркүндөтүп, аны ЮНЕСКОнун тизмесине каттатабыз десек акыры муляжды тартууга келишибиз керек дейт.
"Көк бөрүнү ЮНЕСКОнун тизмесине каттатуу боюнча кайрылуу кат биринчи жолу 2014-жылы жөнөтүлгөн. Бирок оюнда жаныбар колдонула турганын эске алышып, аны каттоодон баш тарткан. Себеби Кыргызстан жаныбарларды жана айлана-чөйрөнү коргоо боюнча бир катар эл аралык келишимдерге кол койгон. Быйыл да көк бөрүнү каттатуу боюнча кат жөнөттүк", — деди ал.
Белгилей кетсек, мелдештерде тартыла турчу улактын салмагы 32-35 килограммга чейин жетет. Учурда жергиликтүү ишканалардын бири муляжды жакшыртып, аны оюнчулардын тартуусуна ыңгайлаштыруу үчүн аракеттерди көрүп жатат.
Экинчи Дүйнөлүк көчмөндөр оюнунда көкбөрүчүлөр атайын коргоочу кийимдерди киет. Анын жакшыртылган түрүн Көк бөрү федерациясы жактырды.
