БИШКЕК, 1-июл. — Sputnik. Жаңы иш орундарынын түзүлүшү жана түз инвестициялардын тартылышы аймак жетекчилеринин ишин баалоодогу башкы критерий болуп саналат. Бул тууралуу премьер-министр Сооронбай Жээнбеков бүгүн өкмөттүн жыйынында өлкөнүн кийинки үч жылга социалдык-экономикалык өнүгүү болжолдорун талкуулоонун жүрүшүндө айтты.
Ал белгилегендей, аймактардагы көптөгөн ишканалар мамлекеттик каражаттардын эсебинен курулууда, бирок быйылкы жылы жетекчилердин ишин баалоодо аймактарга түшкөн бюджеттик эмес каражаттар жана жаңы иш орундарынын түзүлүшү эске алынат.
Министрликтерге, ведомстволорго, аткаруу бийлигинин башка органдарына, өкмөттүн облустардагы ыйгарым укуктуу өкүлдөрүнө, Бишкек жана Ош шаардык мэрияларына бир айлык мөөнөттө өлкөнүн социалдык-экономикалык тармактарынын максаттуу көрсөткүчтөрүн камсыздоо боюнча ведомстволук пландарын иштеп чыгуу тапшырмасын берди.
"Экономиканын өнүгүүсүн камсыздоо үчүн иштеп жаткан өндүрүштүк ишканаларды модернизациялоого, жаңы кубаттуулуктарды ишке киргизүүгө, ички өндүрүштүн көлөмүн жогорулатууга жана айыл чарбанын өндүрүүмдүүлүгү менен экспортту жогорулатууга өзгөчө көңүл бурулушу кажет", — деди өкмөт башчы.
Мындан тышкары, Жээнбеков Финансы министрлигине бюджет жөнүндөгү мыйзамга өзгөртүүлөрдү киргизүү боюнча мыйзам долбоорун тийиштүү тартипте даярдап киргизүүсүн тапшырды.
