БИШКЕК, 24-июн. — Sputnik. Ош — Баткен – Исфана автожолун реабилитациялоо республиканын транспорттук көзкарандысыздыгын камсыздап, жергиликтүү жана аймактык рынокторго жол ачат. Бул тууралуу премьер-министр Сооронбай Жээнбеков аталган жолдун Көк-Талаа — Пүлгөн тилкесин ачуу салтанатында билдирди.
Өкмөт башчы өлкө жетекчилиги жол курулушуна өзгөчө маани берип жатканына токтолду.
"Өлкөбүздүн чыныгы көз карандысыздыгын, экономиканын өнүгүүсүн, инвестициялардын тартылышын жана тышкы рынокторго чыгууну камсыз кылуу үчүн сапаттуу жолдор керек. Учурда Кыргызстанды дүйнөлүк маанидеги транспорттук-коммуникациялык түйүнгө айлантчу жолдорду курууну максат кылып турабыз", — деп белгиледи Жээнбеков.
Жээнбеков өз сөзүндө аталган долборду ишке ашырууга катышып өнөктөш болгон эл аралык донорлорго ыраазычылык билдирди.
Ош — Баткен — Исфана унаа жолунун 108-123 чакырымындагы Көк-Талаа — Пүлгөн жол тилкеси Баткен облусунун Кадамжай районунун аймагында Көк-Талаа жана Пүлгөн калктуу пункттарынын ортосунда жайгашкан. Ал коңшу Өзбекстандын аймагын айланып өтүүчү жол болуп саналат. Жол тилкени реабилитациялоо долбоору Европа коомчулугу тарабынан каржыланып, 8,6 миллион евро бөлүнгөн.
