БИШКЕК, 25-июн. — Sputnik. Кыргызстандык кикбоксер Алексей Федосеев WAKO-PRO версиясынын К-1 бөлүгү боюнча өзүнүн чемпиондук титулун коргоп кала алган жок. Бул тууралуу Combat Press сайтында кабарланды.
Ал франциялык Сальвадор Дилан менен беттешкен.
"Төртүнчү раундда француздун тийген чыканагынан Федосеевдин кашы сыйрылып кетип, оюн токтотулган. Беттеш техникалык нокаут менен аяктады", — деп сайтта маалымдалды.
Беттеш Monte-Carlo Fighting Masters турниринин алкагында Монте-Карло (Монако) шаарында өткөн.
Белгилей кетсек, Федосеев аталган категория боюнча чемпион болгон, бирок Сальвадор Дилан менен болгон беттеште чемпиондугун сактап кала алган эмес. Учурда мушкердин WBKF жана W5 версиялары боюнча дүйнөлүк чемпион деген титулу бар.
